Það er líf og fjör í Molanum þessa dagana þar sem Skapandi sumarstörf Kópavogs eru hafin enn eitt sumarið. Verkefnið hefur verið fastur liður í menningarlífi bæjarins í tvo áratugi og gefið hundruðum ungra skapandi einstaklinga tækifæri til að þróa hugmyndir sínar, öðlast starfsreynslu og stíga sín fyrstu skref í listsköpun og frumkvöðlastarfi.
Fjöldi fyrri þátttakenda hafa haldið áfram í listnámi, menningarstörfum eða stofnað eigin verkefni og fyrirtæki. Margt þekkt listafólk hefur stigið sín fyrstu skref í Skapandi sumarstörfum. Til gamans má geta að Ásgeir Trausti, tónlistarmaður, lagði drög að plötunni sinni Dýrð í dauðaþögn sem þátttakandi í Skapandi sumarstörfum árið . Í samtali við MBL.is í júní 2019 hafði tónlistarkonan Salka Sól þetta að segja um reynslu sína af störfunum: „Við sungum m.a. í sundlauginni, strætó og á Rútstúni. Í skapandi sumarstörfum söng ég í fyrsta skipti með hljómsveit og er ekki í vafa um að það hafi mikið að segja um ákvörðun mína að læra söng- og leiklist.“
Í ár voru 15 verkefni valin til þátttöku úr fjölmörgum umsóknum. Að baki þeim standa 24 ungmenni á aldrinum 18-25 ára sem vinna að fjölbreyttum skapandi verkefnum í sumar, auk fjögurra þátttakenda í Vegglist. Verkefnin spanna meðal annars fatahönnun, margmiðlunarlist, kvikmyndagerð, tónlist, heimildaljósmyndun, skúlptúr, sviðslistir og samfélags- og gjörningalist.
Vel heppnuð kynning á 17. júní
Þátttakendur Skapandi sumarstarfa kynntu verkefni sín í Molanum – Miðstöð ungs fólks, fyrir bæjarbúum þann 17. júní sem hluti af hátíðarhöldunum í Kópavogi og voru viðtökurnar afar góðar. Mikill fjöldi gesta lagði leið sína í Molann þar sem hægt var að hitta listafólkið, sjá vegglistafólk að störfum og fræðast um verkefnin sem unnið er að í sumar.
Gestir fengu meðal annars að sjá klippur úr stuttmyndaverkefnum, hlýða á hljóðdæmi frá upprennandi tónlistarfólki og fylgjast með gjörningum sem fóru fram um hátíðarsvæðið. Kynningin gaf bæjarbúum einstakt tækifæri til að kynnast þeirri fjölbreyttu sköpun sem á sér stað innan hópsins og sýndi vel þann kraft sem býr í ungu listafólki í dag.
Uppskerudagar Skapandi sumarstarfa 20.-24. júlí
Undir lok sumars mun afrakstur verkefnanna birtast á fjölbreyttum sýningum, gjörningum og öðrum viðburðum víðs vegar um bæinn á uppskerudögum Skapandi sumarstarfa sem fara fram í menningarhúsunum 20.-24. júlí. Nákvæm dagskrá verður auglýst von bráðar. Hluti lokaverkefna verður jafnframt samofinn öðrum menningarhátíðum sem fara fram í Kópavogi, þar á meðal Hamraborg Festival og Vöku þjóðlistarhátíð, en jafnframt munu þátttakendur standa fyrir sjálfstæðum sýningum og viðburðum þar sem almenningi gefst kostur á að kynnast verkum þeirra nánar. Ef marka má fyrri ár má búast við fjölbreyttri og lifandi dagskrá sem mun setja svip sinn á Kópavog næstu vikurnar.
,,Það hefur verið stórkostlegt að fylgjast með þessu unga og hæfileikaríka listafólki takast á við fjölbreytt og metnaðarfull verkefni í sumar. Það var æðislegt hvað var mikið af fólki sem gerði sér ferð hingað til okkar í Molann þann 17. júní. Ég vona að öll sjái sér fært að koma og sjá afrakstur sumarsins á uppskerudögunum okkar 20.-24. júlí. Ég er sannfærð um að verkefni eins og skapandi sumarstörf hljóti að vera ein dýrmætasta fjárfesting í menningu og framtíð ungs fólks sem sveitarfélag getur ráðist í.“ segir Klara Elíasdóttir, umsjónarkona Skapandi sumarstarfa í Kópavogi.
