Í tilefni síðustu sýningarhelgar Skýjaborgar á Gerðarsafni býður rithöfundurinn Kamilla Einarsdóttir í hangs í Hamraborginni.
Meðal viðkomustaða verða Tattoo-stofan Black Kross, undirgöngin, vídjómarkaðurinn, bílakjallarinn og fleiri faldar perlur. Ferðalag um Hamraborgina verður svo ekki fullkomnað nema það endi á Catalinu í drykk, segir Kamilla, en hún hefur svo um munar vakið athygli á Hamraborginni sem menningarhöfuðstað síðustu misseri.
Öll eru velkomin, með vin eða ein, í góðu skapi eða á bömmer, það er nefnilega stemning fyrir öllu í Hamraborg!
Viðburðurinn hefst kl.16:00 laugardaginn 15. maí. Tilvalið er að skoða sýninguna Skýjaborg á Gerðarsafni á undan, þar sem safnast verður saman í afgreiðslu safnsins kl.16 og gengið þaðan út í ævintýri dagsins.
Kamilla Einarsdóttir vakti mikla athygli fyrir sína fyrstu skáldsögu, Kópavogskrónika, sem kom út árið 2018. Í bókinni segir móðir í Kópavogi dóttur sinni frá ástarævintýrum sínum en þekkt kennileiti Kópavogs koma þar við sögu. Í kjölfarið var leikrit eftir bókinni í leikstjórn Silju Hauksdóttur sett upp í Þjóðleikhúsinu.
—
Um Skýjaborg í Gerðarsafni:
Skýjaborg er sýning á verkum fjögurra samtímalistamanna sem sprettur úr sameiginlegum grunni: Kópavogi.
Saga staðarins markast af stórhuga áætlunum og kristallar hraða uppbyggingu borgarrýma. Staður sem þróast úr sveit í borg á slíkum hraða að háhýsi eru byggð á sama tíma og sauðfjárbúskapur nær hámarki sínu. Þar sem ákveðið er að reisa 1200 fermetra listasafn þegar aðeins kvartkílómetri hefur verið malbikaður í kaupstaðnum. Hugmyndir um háborg þar sem allt er mögulegt í útjaðri höfuðstaðar.
Listamenn sýningarinnar eru Berglind Jóna Hlynsdóttir, Bjarki Bragason, Eirún Sigurðardóttir og Unnar Örn Auðarson.
27
apr
Gerðarsafn
