Allar hugmyndir mínar renna út í bláinn ásamt fuglunum og fiskunum. Þær fljúga hátt og synda lágt. Þangað til þær snúa við. Og koma til mín seint um nótt, ég sem ætlaði að sofa.
Friðjón Ingi Guðjónsson
10. bekk, Álfhólsskóla
Ég labba á mosa.
Hann kallar á mig,
ég leggst niður.
Vindur gnauðar yfir höfði
en snertir ekki mig.
Ég sé haförn fljúga yfir mig,
svo stór og sterkur fugl.
Sér mig ekki.
Sóley June Martel
6. bekk Salaskóla
Í dag hef ég uppgötvað
að með hverri hugleiðslu
getur vöðvi andlega hjartans orðið sterkur, sterkari, sterkastur
Lukasz Tadeusz Krawczyk
9. bekk Álfhólsskóla
Fuglinn flýgur
Fuglinn flýgur upp í loftin blá
fer til Spánar
í hitann
fuglinn flýgur fuglinn flýgur
Er með dindil inní sér
og flýgur inn
í töfralandið
með risastóru eyrun sín
inn í töfralandið
fuglinn flýgur þar
Fuglinn flýgur fuglinn flýgur
upp á hól
fuglinn flýgur eins og krummi flýgur
Jólin í fyrra
Það er komið sumar
og sólin skín,
en ég mun aldrei gleyma
jólunum í fyrra.
Krumminn
Krumminn leitar að matnum sínum.
Krumminn spyr tröllið
en það vissi ekki hvar
maturinn hans krumma var.
Svo flýgur krumminn yfir fjallið.
Mamma
Þegar ég er leið, ert þú mín skeið
skóflar mér upp af gólfinu
og tekur utan um mig
Orð þín eru hlý og góð
eins og ullarsokkar og kuldaskór
Þú ert eins og sólin bjarta
alveg eins og orðin þín
Þú ert besta mamma mín
og ég verð alltaf stelpan þín
Vettlingur
Einhver týndi vettlingi
Vettlingurinn er kaldur
Hann er frosinn
Hann er umkringdur steinum
Laufin eru búin að falla
Stelpan
Ég horfði á hana.
Hún var svo ljót.
Skökku, gulu tennurnar.
Dökku baugarnir.
Flókið hárið.
Þurru varirnar sem blæddu á meðan flögur duttu af þeim.
Dofin í andliti.
Marblettir um allan líkamann.
Mig langaði að kýla hana en þá myndi spegillinn brotna
Dómnefnd skipuðu Ásta Fanney Sigurðardóttir, Anton Helgi Jónsson og Kristín Svava Tómasdóttir.
Skráðu þig til að fá fréttabréf um viðburði, fréttir og menningu í Kópavogi.
MENNINGARSTOFNANIR
