Ragnheiður Gröndal og Árabátarnir flytja lög sem allir þekkja frá miðbiki síðustu aldar. Um er að ræða hin svokölluðu stríðsáralög sem upphaflega voru sungin af dægurlagasöngkonum þess tíma. Má þar nefna Ingibjörgu Smith, Erlu Þorsteins, Elly Vilhjálms, Ingibjörgu Þorbergs, Hallbjörgu Bjarnadóttur, Öddu Örnólfs og Soffíu Karls. Þessi dagskrá var frumflutt á Jazzhátíð Garðabæjar nú í vor fyrir troðfullu húsi og nú gefst gestum Salarins tækifæri til að sjá, heyra og upplifa.
Ragnheiður Gröndal túlkar hinar sígildu perlur með sinni tímalausu rödd og nýtur stuðnings einvala hljóðfæraleikara sem einnig munu láta ljós sitt skína. Þá fá áhugaverðir sögumolar að fljóta með í dagskránni og húmorinn verður ekki langt undan. Tónleikagestum verður boðið í tímavél í formi tónlistar þessa einstöku kvöldstund með Ragnheiði og Árabátunum.
Árabátarnir eru þeir Guðmundur Pétursson á gítar, Haukur Gröndal á tréblásturshljóðfæri, Birgir Steinn Theodórsson á kontrabassa og Erik Qvick á trommur.
