Miðvikudaginn 25. mars heldur viðburðaröðin Einfaldlega klassík áfram í Salnum þegar Gissur Páll Gissurarson óperusöngvari sest niður með Magnúsi Lyngdal í hádegisspjall og tekur jafnvel lagið.
Tónninn var snemma sleginn í lífi Gissurar Páls þegar hann aðeins ellefu ára gamall hóf söngferil sinn í Þjóðleikhúsinu í titilhlutverki Oliver Twist . Hann nam við Söngskólann í Reykjavík og síðar við Conservatorio G.B. Martini í Bologna, auk þess að njóta handleiðslu Kristjáns Jóhannssonar. Frá fyrstu skrefum sínum sem einsöngvari árið 2003 hefur hann sungið fjölmörg hlutverk og komið fram víða erlendis, meðal annars í Frakklandi, Þýskalandi, Ítalíu, Japan og Bandaríkjunum.
Gissur Páll hefur hlotið verðlaun í alþjóðlegum söngvarakeppnum, þar á meðal í Flaviano Labò-keppninni og í Brescia þar sem hann fékk einnig sérstök verðlaun gagnrýnenda.
Í samtalinu verður sjónum beint að ferlinum, mótandi áhrifum á söngvarann, lífinu á alþjóðlegum vettvangi og óperusöngnum sjálfum.
Aðgangur á viðburðinn er ókeypis og öll eru velkomin.
