Verið velkomin í fræðsluerindi í Náttúrufræðistofu Kópavogs, þar sem við vörpum fram spurningunni ,,Hvað er líffræðileg fjölbreytni?
Alþjóðlega hugtakið líffræðileg fjölbreytni vísar til fjölbreytni alls lífs á jörðinni og nær yfir breytileika innan tegunda, milli tegunda og meðal vistkerfa. Líffræðileg fjölbreytni er hið formlega heiti á hugtakinu en það er einnig kallað líffræðilegur fjölbreytileiki, lífbreytileiki og líffjölbreytni.
Líffræðingarnir Ragnhildur Guðmundsdóttir og Rannveig Magnúsdóttir munu fjalla um líffræðilega fjölbreytni, helstu ógnir sem steðja að lífríki jarðar og hvernig mannkynið (og Ísland) er búið að skuldbinda sig til að stöðva hrun og endurreisa náttúru. Á Íslandi eru ekki margar tegundir en þær sem hafa numið hér land hafa haft einstakar aðstæður til að aðlagast ólíkum búsvæðum án mikillar samkeppni og í einangrun frá meginlöndunum. Þetta lýsir sér oft í mikilli fjölbreytni innan tegunda. Því má segja að talning tegunda ein og sér sé ekki nothæfur mælikvarði á verðmæti líffræðilegar fjölbreytni á Íslandi.
Ragnhildur og Rannveig vinna báðar að málefnum líffræðilegrar fjölbreytni hjá Náttúruminjasafni Íslands og BIODICE og Rannveig er einnig í hlutastarfi hjá Landvernd.
Viðburðurinn er hluti af Menningu á miðvikudögum sem er styrkt af lista- og menningarráði Kópavogsbæjar
