Verið velkomin á spjall með listamönnunum Adele Hyry og JH Engström sunnudaginn 26. janúar kl. 15:00 í Gerðarsafni. Adele og JH Engström eiga verk á sýningunni Stara sem opnar 25. janúar í Gerðarsafni og er hluti af Ljósmyndahátíð Íslands. Athugið að viðburðurinn fer fram á ensku.
Adele Hyry FI (f. 1994) er listamaður og ljósmyndari sem býr í Helsinki. Ljósmyndaverk háns skoða persónulega þætti lífsins en hán leitast við að sprengja verkin út sem eiga þó rætur sínar í raunveruleikanum. Adele nýtur þess að prófa sig áfram með stækkun mynda í litmyrkraherbergi og setja fundna hluti í nýtt samhengi í framsetningum sínum sem gefa verkunum yfirbragð skúlptúra. Hán reynir að forðast fyrirfram ákveðna ramma og stígur út fyrir ríkjandi norm. Ást, samfélag og umhyggja koma ítrekað fram í fjölbreyttum verkum Hyry sem spretta úr skrásetningu á hversdeginum og umbreytast í sýningar og útgáfur. Hyry útskrifaðist með BA gráðu frá ljósmyndadeild Lahti Institute of Design í Finnlandi. Hán hefur einnig stundað nám í ljósmyndun við Valand Academy í Gautaborg.
JH Engström (f. 1969) er sænskur ljósmyndari og vídeólistamaður sem býr og vinnur á milli Parísar og Värmland. Í listsköpun sinni sneiðir Engström framhjá hefðbundnum reglum ljósmyndamiðilsins og leyfir sér fullkomið frelsi. Hann fer létt með að fanga augnablik sem og að sviðsetja myndir, leggur til jafns fyrir sig svart-hvíta ljósmyndun og lit, hann hefur náð tökum á tilviljuninni og leikur sér með tækni til að setja fram vangaveltur um ljósmyndunina sjálfa. Nálgun Engströms felur í sér mjög persónulega túlkun á heiminum þar sem sjálfsævisöguleg könnun er í aðalhlutverki. Hvert portrett eða sjálfsmynd, náttúru- eða landslagsmynd, ber í sér safn minninga og myndar nána, sjónræna og ljóðræna dagbók.
JH Engström hefur sýnt víða alþjóðlega og gefið út fjölda ljósmyndabóka, þar á meðal Shelter (1997), Trying to Dance (2003), Haunts (2005), Tout vas bien (2015) og The Frame (2022).
Myndir: Adele Hyry, JH Engström.
Nánari upplýsingar um sýninguna:
https://gerdarsafn.kopavogur.is/event/stara/
