Menning á miðvikudögum | Söngleiðangur

Söngleiðangur á sýningunni Ó, hve hljótt með Hrafnhildi Árnadóttur Hafstað sópransöngkonu, sem nýverið sló í gegn á vínartónleikum Sinfóníunnar. Hrafnhildur syngur óð til þeirra verka sem vekja hjá henni hughrif og hefst söngleiðangurinn hjá verki eftir Sigurð Guðjónsson með lagi eftir Poulenc. Við verk Doddu Maggýjar syngur Hrafnhildur grískt þjóðlag eftir óþekktan höfund og endar leiðangurinn á Draumalandi Sigfúsar Einarssonar fyrir framan verkið Hraun og mosi eftir Steinu.
Sýningin Ó, hve hljótt var fyrst sett upp í Verksmiðjunni á Hjalteyri 2018 og samanstendur af tíu samtíma kvikmynda- og vídeóverkum eftir íslenska og erlenda listamenn. Verkin gefa tækifæri til að rýna í hvernig  samruni tónlistar og kvikmynda geti stuðlað að sköpun nýstárlegra listaverka. Sýningarstjórar eru Pascale Cassagnau, CNAP og Gústav Geir Bollason.
Hrafnhildur Árnadóttir Hafstað stundaði tónlistarnám á Íslandi og í Hollandi, þaðan sem hún lauk prófi frá Hollensku óperuakademíunni árið 2015 með láði. Hún hefur sungið í fjölmörgum óperum í Hollandi og komið fram sem einsöngvari með Sinfóníuhljómsveit Íslands, sinfóníuhljómsveitinni í Delft og Residentie Orkest. Hún var meðal sigurvegara í keppninni Ungir einleikarar haustið 2011 og söng í kjölfarið einsöng með Sinfóníuhljómsveit Íslands í fyrsta sinn. Nýlega fór hún með hlutverk Violettu í La Traviata í frumlegri uppsetningu í Listasafni Reykjavíkur á Óperudögum og sló síðast í gegn á árlegum Vínartónleikum Sinfóníuhljómsveitarinnar.
Leiðsögnin er liður í dagskránni Menning á miðvikudögum á vegum Menningarhúsanna í Kópavogi sem eru Bókasafn Kópavogs, Gerðarsafn, Náttúrufræðistofa, Héraðsskjalasafn og Salurinn.
Aðgangur er ókeypis og allir velkomnir.