Fimmtudaginn 9. júlí kl. 18.00 mun fjöllistahópurinn Sjarmör Collective bjóða gestum Gerðarsafns að fylgjast með þverfaglegum spuna í samtali við sýninguna Þegar allt kemur til alls.
Sjarmör Collective samanstendur af Benjamín Gísla Einarssyni píanóleikara, Mörtu Hlín Þorsteinsdóttur dansara og Þorsteini Eyfjörð Þórarinssyni hljóðlistamanni. Þau vinna með sambandið milli hljóða, hreyfinga og rýmis og notast við spuna sem rannsóknarform á því hvernig þessir þættir koma saman.
Sjarmör kollektív er afsprengi Skapandi sumarstarfa í Kópavogi 2020. Meðlimir koma allir úr mismunandi áttum en í gegnum starfið fundu sameiginlegan vettvang fyrir skapandi tilraunir og pælingar.
Þegar allt kemur til alls er samsýning með verkum eftir tólf íslenska samtímalistamenn. Verkin hafa verið sérvalin út frá því hvernig fegurðin í hversdagsleikanum, léttleiki, húmor og leikgleði birtast í þeim. Sýningin er viðbragð við aðstæðum í samfélaginu þessa stundina, hugleiðing um það sem máli skiptir fyrir núið og innlegg í samtölin sem eiga sér stað þessa dagana um hvað drífur samfélagið áfram og hvað skiptir okkur máli.
Benjamín er píanóleikari með bakgrunn í bæði klassískri og djass tónlist. Hann stundar bachelornám við djassdeild NTNU háskólans í Þrándheimi.
Marta útskrifaðist með BA í dansi frá Institute of the Arts Barcelona á Spáni og leggur nú lokahönd á Mastersnám í London Contemporary Dance School sem danshöfundur.
Þorsteinn er íslenskur hljóðlistamaður búsettur í Reykjavik. Hann er með bachelor gráðu í myndlist frá LHÍ ásamt því að hafa lagt stund á elektróníska tónlistasköpun við Tónskólann í Kópavogi.
Fimmtudaginn 9. júlí er Sumarbræðingur í Kópavogi, en þá er Gerðarsafn ásamt veitingastaðnum Pure Deli opið til kl. 21.00.
Allir velkomnir og aðgangur ókeypis!
07
jan
Bókasafn Kópavogs
