Holað í steininn. Sýning á verkum úr steini, beini og tré

Haldið verður upp á afmælisdag Kópavogs þann 11. maí, kl. 16:00 með opnun sýningar á verkum Hauks Einarssonar, Holað í steininn.

Tilefni sýningarinnar er myndarleg gjöf Guðríðar Gísladóttur, ekkju Hauks heitins, á úrvali steina og kristalla sem þau hjónin söfnuðu og Guðríður færði Náttúrufræðistofunni fyrir skömmu. Í ljós kom að á heimili hjónanna var ekki einungis að finna gott steinasafn, sem nú er að hluta til í eigu Náttúrufræðistofunnar, heldur einnig athyglisvert safn af listmunum eftir Hauk.
Um er að ræða ýmsa muni og gripi sem Haukur meitlaði, svarf og skar í stein, bein og tré. Öll verkin eru unnin í íslenskan efnivið. Hluta þessara verka úr einkasafni Guðríðar býðst almenningi að skoða á sýningunni.
Af handbragði Hauks heitins er ljóst að hann var mjög hagur í höndum, listfenginn og þolgóður. Sérstaka athygli vekja steinverkin en fáir hafa haft kunnáttu og þolgæði til að vinna í íslenskan stein.
Haukur byrjaði strax á fermingaraldri að fást við handverk og hélt þeirri iðju áfram nær til dánardægurs, liðlega 84 ára. Hann var sjálfmenntaður á listasviðinu, stóð utan við listamannahópa og stílinn hans má flokka undir alþýðulist (naivism).
Slík list er oft sögð hafa barnslegt og einfalt yfirbragð. Það kann vel að vera og í raun ekki leiðum að líkjast. Jafnframt má segja að slíkur stíll feli í sér tiltekinn hreinleika og hrekkleysi – líkt og börn búa yfir. Það eru eftirsóknarverðir eiginleikar.
Á myndinni hér til hliðar má sjá Hauk við eitt verka sinna.