Kampselur í Fossvogi

Ungur kampselur (Erignathus barbatus) vakti nú nýlega athygli þeirra sem leið áttu um göngu- og hjólastíginn sunnan Fossvogs.  Selurinn hafði skriðið upp á stein til að njóta veðurblíðunnar, en ekki gætt að sér þegar féll út og því orðið strandaglópur, þar sem all hátt var ofan af steininum ofan í grýtta fjöru. Þrátt fyrir að aðstæður væru ekki eins og best væri á kosið og ekki um annað að ræða en að bíða flóðs, var selurinn hinn rólegasti og mókti á steininum í góða veðrinu, en hvæsti þó að þeim sem honum þótti koma full nærri.

Kampselir eru flækingar hér við land. Þeir lifa í N- Íshafi og halda sig gjarna á grunnsævi þar sem rekís er að finna, en leggja stundum í mikil ferðalög og flækjast jafnvel upp í ár. Þeir þekkjast frá öðrum selategundum á gríðarmiklum ljósum veiðihárum eða „kömpum“ og af þeim ber selurinn nafn sitt. Kampselir eru  einfarar sem lifa á margskonar hryggleysingjum, s.s. sniglum kröbbum, sæbjúgum og möttuldýrum, en einnig á margskonar fiski og jafnvel þörungum.