Hanna Dóra Sturludóttir verður gestur Magnúsar Lyngdal í viðburðaröðinni Einfaldlega klassík í Salnum 23. september.
Hanna Dóra hefur um árabil verið áberandi í íslensku tónlistarlífi og hefur komið fram í mörgum af stærstu óperuhúsum Evrópu. Hún stundaði nám við Söngskólann í Reykjavík og síðar við Listaháskólann í Berlín og hefur sungið fjölmörg hlutverk í óperum eftir meðal annars Mozart, Verdi og Puccini. Hanna Dóra hefur fengið ýmsar viðurkenningar fyrir söng sinn, bæði hér heima og erlendis, og hefur með einstökum hæfileikum og sviðsframkomu skipað sér í fremstu röð íslenskra óperusöngvara.
Í samtalinu verður sjónum beint að ferli söngkonunnar, mótandi áhrifum á hana, lífinu á alþjóðlegum vettvangi og óperusöngnum sjálfum.
Aðgangur á viðburðinn er ókeypis og öll eru velkomin.
Einfaldlega Klassík er hluti af viðburðaröðinni Menning á miðvikudögum sem fer fram á miðvikudögum í menningarhúsum Kópavogs og er styrkt af menningar- og mannlífsnefnd Kópavogsbæjar.
