Í sumar býður Salurinn gestum sínum enn og aftur í ljúfa tónlistarupplifun í forsal Salarins, en að þessu sinni undir nýju nafni – Sumartónar í Salnum.
Sumartónar í Salnum eru í anda Sumardjazz tónleikaraðarinnar sem Salurinn hefur boðið upp á undanfarin sumur og slegið hefur rækilega í gegn. Með nýju sniði bjóðum upp á fjölbreyttari tónlistarupplifun þar sem fleiri tónlistarstefnur fá að njóta sín.
Tónleikarnir fara fram á fimmtudögum í júní og júlí kl. 17:00-18:00.
Aðgangur er ókeypis og öll hjartanlega velkomin á meðan húsrúm leyfir.
Léttar veitingar verða til sölu.
—
Þann 12. Júní munu Bogomil Font og Snillarnir stíga á stokk og hefja tónleikaröðina með pompi og prakt eins og þeim einum er lagið.
Bogomil Font er hliðarsjálf Sigtryggs Baldurssonar en Sigtryggur hefur verið mikilvirkur í íslensku tónlistarlífi til margra ára og er tónelskum íslendingum vel kunnugur. Hann er bæði þekktur sem trommu- og slagverksleikari með hljómsveitum á borð við Sykurmolana – þar sem hann sló fyrst í gegn. Hann hefur þó ekki síður glatt landsmenn sem gullbarkinn glettni Bogomil Font sem gerði garð sinn frægan með félögunum sínum Milljónamæringunum.
Á tónleikunum í Salnum þann 12. júní verður Bogomil með nýja hljómsveit skipaða úrvalsleikurum: Einari Scheving á trommur, Pálma Sigurhjartarsyni á píanó, Jóel Pálssyni á saxófón og Birgi Stein á bassa. Flutt verða sígild lög af metsöluplötunni Ekki þessi leiðindi sem fagnaði 30 ára afmæli í fyrra, ásamt nýju efni sem til orðið hefur í samstarfi við Hljómskálateymið: Braga Valdimar Skúlason og Guðmund Kristinn Jónsson.
Nýjasta lagið þeirra, Þú trumpar ekki ástina, hefur hlotið mikla spilun upp á síðkastið og verður að sjálfsögðu á efnisskránni – ásamt fleiri smellum og sögum að hætti Bogomils.
