Laugardaginn 20. september stendur Náttúrufræðistofa Kópavogs fyrir sveppagöngu frá kl. 11-13.
Við hittumst við Gamla húsið í Guðmundarlundi (húsið næst bílastæðinu) kl. 11 þaðan sem Jóhannes Bjarki Urbancic vistfræðingur og forsvarsmaður Sveppafélagsins leiðir fræðsluna. Takið með körfu eða annað hart ílát undir sveppina og vasahníf eða lítinn hníf til að hreinsa þá. Gaman er fyrir þau sem eiga að hafa sveppabók og stækkunargler meðferðis.
Þátttakendur eru beðnir um að klæða sig eftir veðri og vera viðbúnir að ganga á ójöfnu undirlagi.
Fjölskyldustundir á laugardögum eru styrktar af Menningar og mannlífsnefnd Kópavogsbæjar.
Um Sveppafélagið:
Sveppafélagið var stofnað í febrúar 2025 í þeim tilgangi að vera umboðmaður og bakhjarl sveppa. Lengi hafði vantað rödd sem talar máli sveppa á Íslandi og félagið var stofnað í þeim tilgangi. Það felur í sér að vekja athygli á málefnum sveppa, styðja við sjálfbæra nýtingu þeirra, auka við þekkingu á sveppum og tala fyrir verndun þeirra þar sem við á.
Öll velkomin.
