Elín Anna Þórisdóttir leiðir listsmiðju þar sem fjölskyldum gefst kostur á því að kanna og kynnast töfrum vatnslitanna í samhengi og sambandi við óvænt efni og sjónarhorn. Smiðjan fer fram laugardaginn 3. október á jarðhæð Gerðarsafns innan um litrík verk Gerðar Helgadóttur og stendur frá 13 til 15. Aðgangur ókeypis.
Gestir eru beðnir um að huga vel að sóttvörnum og fjarlægðarmörkum. Grímur á staðnum.
Verk Elínar Önnu snúast að miklu leyti um sköpunarferlið. Þrá eftir frelsi, gleðinni og ævintýrinu í hinu óvænta sem leiðir að listaverkinu. Hún leitar að innblæstri í skúmaskotum, raðar saman ólíkum hlutum, gerir tilraunir með litatóna, áferð og form. Í ferlinu reynir hún að finna nýtt samhengi eða jafnvægi þangað til þessi rétta tilfinning kemur fram um að verkið hafi komist á flug. Elín Anna er með BA gráðu í myndlist frá LHÍ (2004) og diplómu í keramik frá MÍR (2016) auk Meistaragráðu í listkennslu við LHÍ (2018).
