Davíð Þór Jónsson lýsir upp myrkrið á vetrarsólstöðum í Salnum. Sérstakur gestur er listamaðurinn Ragnar Kjartansson.
Davíð Þór Jónsson (f. 1978) skipar einstakan sess í íslensku tónlistarlífi og þótt víðar væri leitað. Tónlistariðkun hans smýgur undan skilgreiningum; hann er tónskáld, píanóleikari, gríðarlega fjölhæfur hljóðfæraleikari, spuna- og gjörningalistamaður, útsetjari og hljómsveitarstjóri sem á að baki ótrúlega fjölbreytt samstarf við stóran hóp fólks úr öllum geirum og þvert á listgreinar. Hann hefur samið tónlist fyrir kvikmyndir, leikhús, dans- og myndlistarsýningar og tónleikasalinn í allri sinn víðfeðmu mynd en í litskrúðugum hópi samstarfsfólks má finna Skúla Sverrisson, Ólöfu Arnalds, Diddú, Víking Heiðar Ólafsson, Ragnar Kjartansson, Benedikt Erlingsson, Commonnonsense og ADHD. Úr þessum síkvika og magnaða suðupotti sækir Davíð Þór áhrif og innblástur og veitir inn í tónlistarsköpun sem á engan sinn líka.
DÞJ hefur lifað og hrærst í tónlist frá blautu barnsbeini. Hann nam við Tónlistarskólann á Akranesi og síðar við Tónlistarskóla FÍH þaðan sem hann útskrifaðist vorið 2001 með láði. Hann hefur um áratugaskeið verið einn mikilvirkasti liðsmaður íslensks tónlistarlífs og komið fram á óteljandi tónleikum og hátíðum, hérlendis og víða um heim. Hann hefur sinnt kennslu og vinnusmiðjum við MÍT, LHÍ og tónlistarskóla víða.
DÞJ hefur unnið til Íslensku tónlistarverðlaunanna, Grímuverðlaunanna og Evrópsku kvikmyndaverðlaunanna svo eitthvað sé nefnt.
Missið ekki af óviðjafnanlegum vetrartónleikum með þessum frábæra listamanni.
