Erna Vala píanóleikari flytur hina magnþrungnu Píanósónötu nr. 2 eftir Sergei Rachmaninoff á hádegistónleikum í Salnum. Flutningnum fylgir hún úr hlaði með umfjöllun um verkið og tónskáldið en tónleikarnir eru haldnir í tilefni af 150 ára afmæli Rakhmaninoff. Aðgangur er ókeypis og öll hjartanlega velkomin.
Rússneska tónskáldið og píanóvirtúósinn Sergei Rachmaninoff (1873 – 1943) samdi píanósónötu númer tvö árið 1913, þá fertugur að aldri og á hátindi tónsmíðaferils síns. Tæpum tuttugu árum síðar endurskoðaði Rachmaninoff verkið, yddaði og tók út það sem honum fannst vera ofaukið. Píanósónata númer tvö telst til helstu verka tónskáldsins, einkennist af þéttum hljómavef, áhrifamiklum blæbrigðum og útheimtir tæknilega yfirburði og mikla skáldlega andagift flytjandans.
Erna Vala Arnardóttir (f. 1995) lauk bakkalárgráðu í píanóleik við Listaháskóla Íslands hjá Peter Máté 2017 og meistaragráðu í píanóleik við Síbelíusarakademíuna í Helsinki undir leiðsögn Hömsu Juris vorið 2019. Hún hóf svo doktorsnám við USC Thornton School of Music í Kaliforníu sem Fulbright-styrkþegi undir handleiðslu Bernadene Blaha haustið 2019. Erna Vala hefur komið fram á fjölmörgum tónleikum hérlendis og erlendis og verið sæmd ótal viðurkenningum fyrir leik sinn.
Efnisskrá:
Sergei Rachmaninoff (1873-1943):
Píanósónata nr. 2, Op. 36 (útg 1931)
I. Allegro agitato
II. Non allegro – Lento
III. Allegro molto
